Padayon nga kauswagan para sa Norte san Samar pinaagi san pagkilala san sayo nga iginrarako-dako naton nga natural heritage sa probinsya, an Biri Rocks! Kaupod na an Biri Rocks sa opisyal nga listahan san mga National Geological Monuments (NGM) sa aton nasud, parehas san Chocolate Hills san Bohol, Taal Volcano sa Batangas, Ilocos Norte Sand Dunes, Hundred Islands san Pangasinan, ngan iba pa.
San naglabay nga Miyerkules, nagkayaon pagpirma san Memorandum of Understanding (MOU) an aton probinsya, kaupod an National Institute of Geological Sciences (NIGS) san UP Diliman. Ine nga aton pitad para mapabaskog pa an aton geoheritage, geodiversity, geoconservation, ngan geotourism san Norte san Samar kaupod sa aton ginhihingyap nga madeklarar nga magin UNESCO Global Geopark (UGGp).
Dako an aton paglaom nga pinaagi san teknikal nga suporta san UP-NIGS, mas mapapaupay pa an responsable nga turismo, mas mapapakusog an geohazard assessment, ngan mas masiguro an pagpreserbar san aton kalibungan para san sunod nga henerasyon. Nagpapasalamat kita sa UP-NIGS tungod san ira pagsarig ngan kaburunyog pagbulig sa Norte san Samar. Ini nga MOU amo an pagtikang sin bag-o nga yugto san pag-uswag.
Damo nga salamat, Nortehanon! Para ine sa iyo.
Post a Comment